Xəzər Universitetində Ortaq Türk Kültürü Beynəlxalq Simpoziumu keçirildi

26 may 2025-ci il tarixində Xəzər Universitetində mühüm elmi və mədəni hadisə baş tutdu – “Ortaq Türk Kültürü Beynəlxalq Simpoziumu: Oğuz Türkmənlərinin Dünəni, Bu Günü və Gələcəyi” adlı beynəlxalq simpozium uğurla keçirildi. Tədbir dosent Aynur Qəzənfər qızının təşkilatçılığı ilə təşkil olunub və Türk dünyasının mədəni, elmi inteqrasiyasına töhfə vermək məqsədi daşıyırdı.

Simpoziumda yalnız Azərbaycan alimləri deyil, eyni zamanda Türkiyə, Qazaxıstan, Özbəkistan və digər ölkələrdən olan tanınmış tədqiqatçılar, ziyalılar və elm adamları iştirak etdilər. Onlar Oğuz Türkmənlərinin tarixi inkişaf mərhələləri, ədəbi və dil xüsusiyyətləri, adət-ənənələri və bu günkü Türk coğrafiyasında oynadığı rol haqqında dəyərli məruzələrlə çıxış etdilər.
Panel iclasları, elmi diskussiyalar və təqdimatlar çərçivəsində ortaq türk kimliyi və Oğuz Türklərinin mədəni irsi geniş şəkildə təhlil olundu. Çıxış edən hər bir alim Oğuz Türklərinin keçmişi və bu günü ilə yanaşı, gələcək nəsillərə bu zəngin mirasın necə ötürülməli olduğu mövzusuna da toxundu. Təqdim olunan elmi məruzələr təkcə akademik deyil, həm də mədəni baxımdan dəyərli mənbə kimi qiymətləndirildi.
Tədbirin diqqətçəkən məqamlarından biri də ortaq türk əlifbası məsələsinin gündəmə gətirilməsi oldu. Müzakirələr zamanı bu əlifbanın 34 hərfdən ibarət olması təklif edildi və ortaq kommunikasiya imkanlarının genişlənməsi baxımından böyük əhəmiyyət daşıdığı vurğulandı. Bu təşəbbüs Türk xalqları arasında həm elmi, həm də mədəni əlaqələrin möhkəmləndirilməsinə xidmət edəcək.
Simpozium çərçivəsində həmçinin “Manas” və “Koroğlu” dastanları kimi ortaq ədəbi irsimizə də xüsusi yer verildi. Bu dastanlar üzərində aparılan müqayisəli təhlillər türk xalqları arasında ortaq dəyərlərin nə qədər güclü və qədim olduğunu bir daha göstərdi.
Tədbirin iştirakçıları sırasında Xəzər Universitetinin müəllim və tələbə heyəti də geniş şəkildə təmsil olunurdu. Onlar simpozium boyu səsləndirilən fikirləri böyük maraqla dinlədilər və təqdim olunan məqalələrdən faydalandılar. Tədbirin ümumi axıcılığı, təşkilati ardıcıllığı və elmi səviyyəsi yüksək qiymətləndirildi.
Simpoziumun sonunda təşkilatçı dosent Aynur Qəzənfər qızı çıxış edərək tədbirin elmi və mədəni əhəmiyyətini vurğuladı, bütün iştirakçılara təşəkkürünü bildirdi. Qeyd olundu ki, belə tədbirlər Türk dünyasında həmrəyliyin, ortaq tarix və dəyərlərin qorunub yaşadılmasının mühüm göstəricisidir.
Xəzər Universitetinin ev sahibliyi etdiyi bu mötəbər simpozium, elm və mədəniyyət tariximizdə əlamətdar hadisə kimi yadda qalacaq.

Pəri Nəsibova (Filologiya( Azərbaycan dili və ədəbiyyatı) 1-ci kurs)

Aydan Əliyeva (Filologiya( Azərbaycan dili və ədəbiyyatı) 1-ci kurs)

Kamilə Səfərbəyova (Filologiya( Azərbaycan dili və ədəbiyyatı) 1-ci kurs)

Pərvaz İsmayılzadə (Filologiya( Azərbaycan dili və ədəbiyyatı) 1-ci kurs)

İnci Məmmədova (Filologiya( İngilis dili və ədəbiyyatı) 2-ci kurs)

Nigar Ələsgərli (Azərbaycan dili və ədəbiyyatı meəllimliyi, 1-ci kurs)